Zgjedhjet janë edhe 4 muaj larg, por procedurat thuajse kanë nisur nga të gjitha partitë politike në Shqipëri që kanë vendosur të hyjnë në garën e 25 prillit. Diku po diskutohen koalicionet, disa parti të tjera janë në diskutime për emrat, apo zonat e kandidimit të tyre. Por, mbi të gjitha partitë synojnë që të gjejnë emra të pastër dhe pa të kaluar kriminale, pasi rreziku është evident dhe madje nuk është e largët koha kur zgjedhjet lokale të 2019 lanë pa kryetar bashkinë e Vorës apo të Shkodrës. Sipas ligjit të dekriminalizimit të vitit 2015, në nenin 8 thuhet partitë politike dorëzojnë emrat në Prokurori, prej nga kërkohet informacion për secilin individ që futet në garë për një vend në parlament. Në këtë nen janë përcaktuar në detaje se si dhe kur kërkohet informacion. Madje, për cdo kandidat nuk merren të dhëna vetëm në territorin e Republikës së Shqipërisë, por edhe më tej. Kur ka informacion dhe është e nevojshme, verifikimi kryhet edhe jashtë territorit të Republikës së Shqipërisë. Kërkesa për verifikim pranë organeve të juridiksioneve të huaja bëhet nga Prokurori i Përgjithshëm thuhet në nenin përkatës. Pas kësaj, Prokuroria e Përgjithshme jep informacion për cdo kërkesë dhe e paraqet këtë në Komisionin Qendror të Zgjedhjeve. Më pas është ky institucion që refuzon kandidimin sipas nenit 10 të Ligjit për Dekriminalizimin. Në rast të konstatimit të kushteve për zbatimin e ndalimeve të parashikuara nga ky ligj për kategoritë e tjera, përjashtuar Presidentin e Republikës, deputetët, anëtarët e Këshillit të Ministrave, kryetarët e bashkive dhe këshilltarët bashkiakë, organi kompetent, sipas këtij ligji, për verifikimin, shpall publikisht rezultatin e verifikimit dhe funksioni përfundon menjëherë, në rast të shkeljes së ligjit.