Rikandidim apo figura të reja në zgjedhjet lokale të 14 majit? Kryesocialisti Edi Rama tashmë ka filluar turin elektoral në 61 bashkitë e vendit, ku mësohet se ekipi me të cilin garon në zgjedhjet vendore do të ndjekë kryesisht politikën e rikandidimit. Zgjedhjet e nënta në vend që pas rrëzimit të komunizmit, luajnë një peshë të madhe në caktimin e balancave politike në vend, ndaj edhe gara pritet të mos jetë e lehtë. Në Tiranë, emri i Erion Veliajt është konfirmuar nga kryeministri Rama, teksa pritet përfundimi i primareve në kampin demokratik për të parë se cili do të jetë rivali i Veliajt. Në Durrës pritet po i njëjti skenar si në zgjedhjet e 6 Marsit, ku kryebashkiakja Emirjana Sako fitoi 58 përqind të elektoratit dhe pritet që emri i saj të shënohet sërish në fletët e votimit nën siglën e Partisë Socialiste.