Mbajtja e zgjedhjeve në Siri mund të zgjasë deri në katër vjet, tha udhëheqësi de fakto i Sirisë Ahmed al-Sharaa në një intervistë me Al Arabiya të dielën, hera e parë që ai përmend një afat kohor të mundshëm për mbajtjen e zgjedhjeve që kur Bashar al-Assad u rrëzua këtë muaj. Hartimi i një kushtetute të re mund të zgjasë deri në tre vjet, tha Sharaa në intervistën me transmetuesin shtetëror saudit. Ai tha gjithashtu se do të duhet rreth një vit që sirianët të shohin ndryshime drastike në vend. Sharaa drejton grupin Hayat Tahrir al-Sham që rrëzoi Bashar al-Assad më 8 dhjetor, duke i dhënë fund dekadave të sundimit të familjes Assad dhe një lufte civile 13-vjeçare. Ai tha se HTS do të shpërbëhet në një konferencë të dialogut kombëtar. Përsa i përket lidhjeve me jashtë, Sharaa tha se Siria ka interesa strategjike me Rusinë. Rusia ka baza ushtarake në Siri dhe ishte një aleate e ngushtë e Asadit gjatë luftës së gjatë civile, madje edhe i ka dhënë azil atij. Sharaa tha në fillim të këtij muaji se marrëdhëniet e Sirisë me Rusinë duhet t'u shërbejnë interesave të përbashkëta. Sharaa tha gjithashtu se shpreson që administrata e presidentit të zgjedhur të SHBA-së, Donald Trump, të heqë sanksionet e vendosura ndaj Sirisë. Diplomatët e lartë amerikanë që vizituan Damaskun këtë muaj thanë se Sharaa u pa si pragmatik dhe se Uashingtoni ka vendosur të heqë një shpërblim prej 10 milionë dollarësh për kokën e udhëheqësit të HTS.