Afati I ligjit për investimet strategjike u shty nga Kuvendi pak ditë më parë deri më 31 Dhjetor të vitit 2026. Vendimi tashmë I miratuar, sipas ministrisë së Ekonomisë, Kulturës dhe Inovacionit, u jep kohë dhe mundësi të reja investitorëve për të aplikuar. Ndërkohë sqarohet se ky ligj sjell monitorim më të rreptë të projekteve për më shumë siguri dhe zbatim; Kuadër ligjor të përmirësuar për më shumë transparencë dhe efikasitet; si dhe mbështetje të dedikuar për investitorët e huaj dhe vendas; Efekti ekonomik pritet të jetë pozitiv pasi priten mbi 2.7 miliardë euro investime. Po ashtu kjo nisëm ligjore pritet të krijojë dhe 24,323 vende të reja pune si dhe të rris me 2 miliardë euro investimet e huaja direkte. Sektorët prioritarë janë turizmi, ku 75% e vlerës së investimeve strategjike vijnë nga investitorë të huaj; si dhe Energjia dhe Infrastruktura ku do të ketë mbështetje për projekte inovative dhe të qëndrueshme. Ky ligj, thotë ministria e Ekonomisë, jo vetëm që krijon një klimë më të favorshme për investitorët, por edhe forcon perspektivat e zhvillimit ekonomik të vendit. “Me një kuadër të përmirësuar ligjor dhe një angazhim të shtuar për transparencë dhe efikasitet, Shqipëria vazhdon të jetë një destinacion konkurrues për investimet strategjike.”, thekson ministria. Ndërkohë nga ana tjetër, opozita është rreshtuar kundër këtij ligji pasi po përfitojnë njerëz që janë afër qeverisë dhe nuk po sjell asnjë të mirë tek qytetarët shqiptarë. Nisma ligjore u miratua me 73 vota pro nga ana e socialistëve, ndërsa opozita nuk mori pjesë.