Presidenti Volodymyr Zelensky zhvilloi takime të veçanta me Sekretarin e Përgjithshëm të NATO-s Jens Stoltenberg dhe ministrin francez të Mbrojtjes Sebastien Lecornu gjatë vizitës së dy zyrtarëve në Kiev këtë të enjte. Zelensky mbajti një konferencë për shtyp me Stoltenberg pas takimit të tyre. Presidenti tha se Kievi dhe NATO po bëjnë gjithçka që munden për të siguruar që Ukraina të bëhet anëtare e aleancës sa më shpejt të jetë e mundur. “Ukraina tashmë mbron hapësirën e përbashkët të lirë që bashkon të gjithë anëtarët e NATO-s. Fitorja e Ukrainës në këtë luftë të paprovokuar dhe kriminale të nisur nga Rusia është edhe për të garantuar siguri dhe paqe afatgjatë, dhe jo vetëm për vendin tonë, por për të gjithë kontinentin", tha Zelenksy. Presidenti tha se ai diskutoi të gjitha çështjet kryesore të mbrojtjes me Stoltenberg, duke përfshirë situata në fushën e betejës dhe nevojat e ushtrisë ukrainase. Zelensky gjithashtu zhvilloi bisedime me ministrin francez të Mbrojtjes Sebastien Lecornu, duke diskutuar kryesisht mënyrat për të forcuar aftësitë e mbrojtjes ajrore të Ukrainës.