Ndërsa tensionet mes anëtarëve lindorë të NATO-s dhe Kremlinit po rriten, presidenti ukrainas, Volodymyr Zelensky, u bëri thirrje Shteteve të Bashkuara të vendosin masa “të fuqishme” kundër Rusisë. Kjo javë për Zelenskyn pritet që të jetë shumë intensive pasi ai pritet të takohet dhe me presidentin amerikan Donald Trump, në margjinat e Asamblesë së Përgjithshme të OKB-së javën e ardhshme, megjithëse Uashingtoni ende nuk e ka konfirmuar ndonjë takim ballë për ballë mes tyre. “Kjo javë na ka afruar më shumë drejt finalizimit të paketës së 19-të të sanksioneve [të BE-së] kundër agresionit rus; presim miratimin e saj së shpejti. Burimet energjetike të Rusisë po kufizohen”, tha Zelensky mbrëmjen e të shtunës ndërsa shtoi se: “Ne presim sanksione [nga SHBA-ja] nëse nuk ka takim mes liderëve ose, për shembull, nëse nuk ka armëpushim”. Zelensky e përsëriti gjithashtu qëndrimin e tij se është i gatshëm të takohet me presidentin rus, Vladimir Putin, i cili deri tani nuk ka pranuar takim në vend neutral. Ndërkohë Trump nga ana tjetër ka mbetur i zhgënjyer nga Putini pasi nuk po tregon gatishëmri për t’u takuar me Zelenskyn dhe për të të diskutuar për një armëpushim të mundshëm mes dy vendeve.