Britania e madhe i kërkoi aleatëve të tjerë të Ukrainës, të premten, që të arrijnë një marrëveshje për të përdorur asetet e ngrira ruse për të forcuar pozicionin e saj në çdo bisedim të ardhshëm për paqen, ndërsa Presidenti Volodymyr Zelenski mbërriti në Londër për bisedime. Zyra e Kryeministrit britanik Keir Starmer tha se ai do të ushtrojë gjithashtu presion mbi vendet e "Koalicionit të të vullnetshmëve" që të largojnë naftën dhe gazin rus nga tregu global dhe t'i japin Kievit më shumë raketa me rreze të gjatë veprimi. Starmer ndërkohë, tha në takimin me Zelenskin, se Putin nuk e kishte seriozisht përfundimin e luftës. "Herë pas here i ofrojmë Putinit mundësinë për t'i dhënë fund pushtimit të tij të panevojshëm, për të ndaluar vrasjet dhe për të tërhequr trupat e tij, por ai vazhdimisht i refuzon këto propozime dhe çdo shans për paqe", tha ai. Bisedimet e së premtes në Londër ishin një përzierje takimesh ballë për ballë dhe virtuale, me Sekretarin e Përgjithshëm të NATO-s Mark Rutte, Kryeministrin holandez Dick Schoof dhe Kryeministren daneze Mette Frederiksen, të cilëve iu bashkua Starmer dhe Zelenski.