Presidenti ukrainas Volodymyr Zelensky propozoi emërimin e Kryeministrit Denys Shmyhal si ministër të mbrojtjes, në një riorganizim të rëndësishëm politik. Shmyhal ka shërbyer si kryeministër që nga viti 2020, duke drejtuar qeverinë ukrainase gjatë pandemisë së koronavirusit dhe fillimit të pushtimit rus në vitin 2022. Ministrja e ekonomisë Yulia Svyrydenko pritet të zërë vendin e Shmygal, ndërsa ministri aktual i mbrojtjes Rustem Umerov mund të bëhet ambasador në Shtetet e Bashkuara, tha Zelensky javën e kaluar. Riorganizimi, më i madhi që nga pushtimi i Rusisë në vitin 2022, vjen pas muajsh të tëra pengesash në fushëbetejë dhe përshkallëzimit të sulmeve ajrore ruse në qytetet ukrainase. "Përvoja e gjerë e Denys Shmygal do të jetë sigurisht e dobishme në pozicionin e Ministrit të Mbrojtjes së Ukrainës", tha Zelensky pa dhënë më shumë detaje. Emërimi i Shmyhal do të kërkojë miratimin e parlamentit, i cili është bashkuar rreth Zelenskit që nga pushtimi dhe nuk ka gjasa të votojë kundër tij.