Presidenti ukrainas Volodimir Zelenski, bëri një vizitë të paparalajmëruar në Lituani të mërkurën, në kuadër të një udhëtimi në vendet baltike ku ai do të tentojë të mbledhë më shumë mbështetje për vendin e tij që po përgatitet të hyjë në vitin e tretë të luftës. Tre shtetet Baltike, të gjitha ish republika sovjetike, janë tani anëtare të BE-së dhe NATO-s, e në të njëjtën kohë, janë edhe mbështetësit më të vendosur të Ukrainës. “Estonia, Letonia dhe Lituania, janë miqtë tanë të besueshëm dhe partnerët kryesorë. Sot unë mbërrita në Vilnius, para se të ndalem në Tallin dhe Riga”, tha Zelenski në platformën e medias sociale X. “Siguria, BE dhe integrimi në NATO, bashkëpunimi në fushën e luftës elektronike dhe dronëve, si edhe koordinimi i mbështetjes së mëtejshme evropiane, janë në axhendë”, tha ai. Turi në baltik, shënon edhe udhëtimin e parë jashtë vendit të Zelenskit, për këtë vit. Lituania është një donatore e madhe për Ukrainën dhe zelenski tha se do të zhvillojë bisedime atje me presidentin, kryeministrin dhe kryetarin e parlamentit si edhe do të takohet me komunitetin ukrainas atje. Vizita vjen ndërsa aleatët e tjerë të Kievit kanë frenuar ndihmat ndërkohë që vendi ëhstë përballur me sulme intensive të rusisë këto javë të fundit dhe është hakmarrë me goditje në qytetin kufitar rus, Belgorod. Zelenski i ka kërkuar aleatëve të vazhdojnë të ndihmojnë me armë Ukrainën dhe ka zhvilluar takime me zyrtarë nga SHBA, Gjermania dhe Norvegjia, muajin e kaluar. Por, një paketë ndihmash e BE-së është bllokuar në bruksel nga Hungaria ndërkohë që kongresi amerikan mbetet i ndarë për fondet shtesë për ukrainën.