Presidenti ukrainas Volodymyr Zelensky do të takohet me Presidentin amerikan Donald Trump në Uashington të premten, ndërsa Trump do të shqyrtojë mundësinë nëse do ta armatosë Ukrainën me raketa Tomahaëk të afta të godasin thellë në Rusi. Takimi i tyre vjen një ditë pasi Trump tha se u bë "përparim i madh" gjatë një telefonate me Presidentin rus Vladimir Putin, me të dy që ranë dakord për bisedime ballë për ballë në Hungari. Trump tha se telefonata, e para me Putinin që nga mesi i gushtit, ishte "shumë produktive", duke shtuar se ekipet nga Uashingtoni dhe Moska do të takohen javën e ardhshme. Ndërsa Zelensky mbërriti në SHBA, vizita e tij e tretë që nga janari, ai tha se Moska po "nxitonte të rifillonte dialogun sapo dëgjoi për Tomahaëk-ët". Zelensky i ka bërë thirrje SHBA-së t'i sigurojë Ukrainës raketat e avancuara, të cilat kanë një rreze veprimi prej 2,500 km. I pyetur më herët këtë javë nëse Trump po shqyrtonte dhënien e Tomahaëk-ëve Ukrainës, ai tha: "Do ta shohim... Mund ta bëj këtë". Por i pyetur për të njëjtën perspektivë pas telefonatës së tij me Putinin, Trump tha se "nuk mund t'ë shterojë" rezervat amerikane të Tomahaëk-ëve, duke shtuar se "edhe SHBA ka nevojë për to. Duke shkruar në platformën e tij Truth Social pas përfundimit të telefonatës së tij me Putinin, Trump tha se ai dhe presidenti rus "kaluan shumë kohë duke folur për Tregtinë mes Rusisë dhe Shteteve të Bashkuara kur të mbarojë Lufta me Ukrainën". Ai tha se "këshilltarët e nivelit të lartë" nga të dy vendet do të takohen në një vend të paspecifikuar javën e ardhshme, me Sekretarin e Shtetit Marco Rubio që do të kryesojë delegacionin amerikan. Trump tha gjithashtu se do ta informojë Zelenskyn mbi bisedimet e tij me Putinin të premten, duke shtuar: "Unë besoj se u bë përparim i madh me bisedën telefonike të sotme". Ai më vonë u tha gazetarëve se priste të takohej me Putinin në Hungari "brenda dy javësh".