Presidenti i Ukrainës, Volodymyr Zelensky, do të takohet në Londër me kryeministrin e ri britanik, Andy Burnham. Takimi shënon fillimin e një jave të rëndësishme diplomatike për Zelenskyn, në kohën kur Ukraina po përballet me intensifikimin e sulmeve ajrore ruse dhe rritjen e numrit të viktimave civile. Zelensky është udhëheqësi i parë i huaj që pritet nga Burnham, vetëm një javë pasi ai mori detyrën e kryeministrit, pas dorëheqjes së Keir Starmerit. “Britania qëndron krah Ukrainës dhe mbështetja jonë mbetet e palëkundur”, tha Burnham në prag të vizitës. “Rusia nuk duhet të ketë asnjë dyshim për vendosmërinë tonë. Ne nuk do të tërhiqemi derisa të arrihet një paqe e drejtë dhe afatgjatë për Ukrainën”, shtoi Burnham, i cili zhvilloi një bisedë telefonike me Zelenskyn vetëm disa orë pasi mori detyrën më 20 korrik. Zyra e kryeministrit britanik tha se fakti që Zelensky është lideri i parë i huaj që pritet nga Burnham, “tregon forcën e marrëdhënieve mes dy vendeve”. Burnham dhe Zelensky pritet të takojnë edhe disa nga 200 ushtarakët ukrainas që kanë qëndruar në Britani gjatë tri javëve të fundit, ku kanë marrë pjesë në stërvitje për sigurinë detare dhe çminimin e zonave ujore, në kuadër të përgatitjeve për misione të mundshme në Detin e Zi. Gjatë vizitës, Burnham pritet të njoftojë se Britania do të ndajë me Ukrainën pronësinë intelektuale të sistemit të ri britanik të luftës elektronike “Stone Cloak”, duke i mundësuar Kievit që ta prodhojë vetë këtë teknologji. Sipas zyrtarëve britanikë, pajisjet për bllokimin e sinjaleve elektronike, me madhësinë e një tableti, mund të vendosen në dronë për të penguar sistemet ruse të mbrojtjes ajrore që t’i zbulojnë, gjurmojnë dhe godasin ata. Zyra e kryeministrit britanik tha se mbështetja e Mbretërisë së Bashkuar për Ukrainën ka arritur në rreth 33 miliardë dollarë që nga fillimi i pushtimit të plotë rus në shkurt të vitit 2022. Prej tyre, rreth 21 miliardë dollarë janë ndarë si ndihmë e drejtpërdrejtë ushtarake. Pas vizitës në Londër, Zelensky pritet të udhëtojë për në Uashington, ku do të zhvillojë bisedime me presidentin amerikan, Donald Trump. Për muaj të tërë, zyrtarët ukrainas kanë lobuar në Uashington për leje për të prodhuar raketa interceptuese Patriot.