Presidenti ukrainas Volodymyr Zelenski sugjeroi në një video të publikuar të mërkurën se Kievi ka kërkuar furnizime me raketa amerikane Tomahaëk me rreze të gjatë veprimi, pasi ai kritikoi rrjedhjen e informacioneve konfidenciale. Raketat Tomahaëk kanë një rreze veprimi prej 2,500 km, shumë më e madhe se çdo raketë që Ukraina ka aktualisht në arsenalin e saj. Një dërgesë e tillë armësh me siguri do të shihej nga Rusia si një përshkallëzim në luftën e saj në Ukrainë. Zelenski udhëtoi për në Shtetet e Bashkuara muajin e kaluar për t'i paraqitur një "plan fitoreje" Presidentit Joe Biden, për të cilin ai tha se mund të ndihmojë në vënien nën presion të moskës për të negociuar përfundimin e luftës. Udhëheqësi ukrainas ka thënë që atëherë se plani parashikon një "paketë parandaluese jo-bërthamore" që do të përdoret vetëm nëse Moska nuk i jep fund pushtimit të saj në shkallë të plotë dhe vazhdon të përshkallëzojë konfliktin. Disa nga detajet e planit janë mbajtur konfidenciale, diçka që Zelenski e la të kuptohej në komentet e tij për gazetarët nordikë të martën. "Kur shumë vende filluan të mbështesin planin e fitores, e shikoni se ç’ndodh në media...ata thanë se Ukraina donte shumë raketa, si Tomahaëks etj. Por ky ishte informacion konfidencial, mes Ukrainës dhe Shtëpisë së Bardhë". Neë York Times citoi një zyrtar të lartë amerikan të martën të thoshte se Zelenski kishte kërkuar raketa Tomahaëk, kërkesë kjo që zyrtari tha se ishte krejtësisht e pamundur të realizohej. Shtetet e Bashkuara kanë qenë burimi më i rëndësishëm i ndihmës ushtarake të Ukrainës që nga pushtimi rus në shkurt 2022, por gjithashtu ajo është përpjekur të mos bëjë asgjë që mund ta shtynte Rusinë e armatosur me armë bërthamore të përgjigjet ashpër ose të zgjerojë konfliktin. SHBA për shembull, nuk e lejon Ukrainën të godasë me armë perëndimore objektivat ushtarake thellë në Rusi, pavarësisht thirrjeve të përsëritura të Kievit për ta lejuar që ta bëjë këtë.