Presidenti ukrainas, Volodimir Zelenski i ka bërë një ftesë presidentit kinez Xi Jinping, që të vizitojë vendin e tij, raportoi Associated Press të mërkurën. “Ne jemi gati ta presim atë këtu”, tha Zelenski në një intervistë për agjencinë e lajmeve. Xi Jinping nuk ka folur me Zelenskin që nga pushtimi rus i ukrainës, shkurtin e vitit të kaluar, por Kina publikoi një plan me 12 pika për një zgjidhje politike të krizës së ukrainës, muajin e kaluar. Presidenti kinez foli për konfliktin edhe me mikun e tij të dashur, sic e quajti ai, presidentin rus Vladimir Putin ndërsa ndodhej në një vizitë shtetërore në Moskë, javën e kaluar, edhe pse bisedimet nuk treguan asnjë progres drejt fundit të luftës. Propozimi kinez përfshin një thirrje për një armëpushim të mundshëm në Ukrainë. Por, SHBA e ka hedhur poshtë propozimin duke qenë se Kina ka refuzuar të dënojë rusinë për pushtimin e saj të Ukrainës.