Fitorja jonë është e pashmangshme nëse aleatët "respektojnë premtimet dhe afatet e tyre" në lidhje me armët, tha ndër të tjera Volodimir Zelenskij në një konferencë të gjatë për shtyp të mbajtur në Kiev me rastin e 1 vjetorit të nisjes së luftës. Presidenti ukrainas iu referua premtimeve për tanke, por sinjalizoi edhe marrjen e avionëve të mundshëm luftarakë, që tha se do të dërgohen nga vende europiane. Ai u shpreh i gatshëm të pranojë ndërmjetësimin e Kinës, apo Indisë për zgjidhjen e konfliktit, por me kusht që propozimet të jenë të sinqerta dhe të garantojnë sovranitetin territorial të Ukrainës. Zelenski tha se momenti më i vështirë në gjithë këtë vit ka qenë kur u cclirua Bucha dhe zbulimi i varreve masive atje, në prillin e vitit të kaluar. Ai tha gjithashtu se së fundmi kishte pasur një bisedë telefonike me Presidentin turk, Erdogan. Edhe Kremlini njoftoi një bisedë me Presidentin turk, por tha se ajo ishte fokusuar te respektimi i marrëveshjeve të nënshkruara mes dy vendeve për energjinë dhe tregtinë.