Paqja në Evropë, që lulëzoi pas përfundimit të Luftës së Dytë Botërore, është zhdukur si pasojë e agresionit rus në Ukrainë, dhe Rusia përbën kërcënim për gjithë kontinentin, tha presidenti ukrainas, Volodymyr Zelensky. “Ne jetojmë në një kohë kur Evropa nuk është më kontinent i paqes”, tha Zelensky para Parlamentit të Francës në Paris, të premten. “Ne jetojmë në kohën kur nazizmi po kthehet sërish, fatkeqësisht. Tani në Evropë qytetet sërish po shkatërrohen dhe fshatrat po bëhen hi. Në Evropë ende kemi kampe filtrimi, dëbime dhe urrejtja është bërë kult në Rusi”. Zelenski ndodhet në francë me ftesën e presidentit francez, Emmanuel Macron, për të marrë pjesë në ceremonitë e shënimit të 80 vjetorit të zbarkimit të trupave aleate në normandi, që është në të njëjtën kohë edhe fillimi i clirimit të evropës nga gjermania naziste. Më vonë zelenski do të takohet edhe me presidentin amerikan, Joe Biden. Gjatë një fjalimi të mbajtur të enjten, Biden tha se bota e lirë është me Ukrainën dhe nuk do t’i nënshtrohet agresionit rus, duke ngritur paralele me luftën e forcave aleate për të çliruar Evropën prej Gjermanisë naziste. Shtetet e Bashkuara dhe NATO-ja nuk do ta braktisin Ukrainën, tha Biden. Në ceremoninë përkujtimore nuk ishte ftuar as presidenti rus, Vladimir Putin, dhe as zyrtarë tjerë të Rusisë. Përgjatë bisedimeve të Bidenit me Zelenskyn, tema kryesore e bisedës pritet të jetë synimi i Kievit për t’u anëtarësuar në aleancën me 32 vende anëtare, NATO. Në një intervistë të dhënë së fundmi për revistën amerikane Time, Biden ka thënë se nuk e mbështet anëtarësimin e Ukrainës në NATO.