Kur Rusia e nisi pushtimin e Ukrainës në shkurt 2022, ukrainasit u rreshtuan për t'iu bashkuar forcave të armatosura, në një shpërthim patriotizmi që frymëzoi botën perëndimore dhe sfidoi pritshmërinë e Moskës. Tani, dy vjet më vonë, midis luftës së tmerrshme nëpër llogore, mungesës së përparimit në fushëbetejë dhe pasi kanë vdekur apo janë plagosur dhjetëra mijëra ushtarë, dëshira e madhe për t’u regjistruar në ushtri është duke u shuar. Mungesa e rekrutëve të rinj përbën rrezik të madh për përpjekjet e Ukrainës në luftë kundër Rusisë, e cila e ka një popullsi tre herë më të madhe dhe po vazhdon të mobilizojë trupa, përfshirë të dënuar me burg. Natën e Krishtlindjeve, Qeveria ukrainase e paraqiti në Parlament një projektligj për mobilizimin, duke nxitur reagime nga disa ligjvënës të opozitës. Projektligji u dorëzua në emër të kryeministrit dhe ministrit të mbrojtjes, e jo të presidentit, i cili është edhe komandanti i përgjithshëm. Disa ekspertë e konsideruan këtë si shenjë se Zelenski ka frikë se popullariteti i tij mund të marrë një goditje. Ndërkohë, besimi ndaj qeverisë ukrainase ka shënuar rënie.