Drejtori i CIA-s propozoi një takim trepalësh mes Presidentit Trump, Presidentit rus Putin dhe Presidentit ukrainas Zelensky gjatë vizitës së tij të fshehtë në Moskë në fillim të kësaj jave, në një përpjekje për t'i dhënë fund luftës, thanë për Axios dy burime të informuara mbi këtë çështje. Kjo ishte hera e parë që Ratcliffe përfshihet personalisht në përpjekjen diplomatike për të ndërmjetësuar një përparim midis Rusisë dhe Ukrainës. Vizita e Ratcliffe kishte për qëllim pjesërisht të përcaktonte nëse krerët e shërbimeve të inteligjencës së Rusisë mund të ndihmonin në bindjen e Putinit për të ecur drejt rifillimit të negociatave të ndërmjetësuara nga SHBA-ja me Ukrainën, thanë burimet. Të premten, zyrtarët amerikanë informuan Zelenskin mbi bisedimet e Ratcliffe në Moskë dhe propozimin për një samit trepalësh. Administrata Trump e ka ngritur idenë edhe në të kaluarën. Zelensky ka qenë dakord për një takim, por Putin e ka refuzuar atë. Ratcliffe bëri një udhëtim të fshehtë në Moskë të martën dhe u takua me homologët e tij rusë: shefin e inteligjencës së jashtme të SVR, Sergey Naryshkin, dhe drejtorin e FSB-së, Alexander Bortnikov. Zyrtarët amerikanë i thanë Zelenskit se Ratcliffe gjithashtu foli në Moskë për mundësinë e rifillimit të bisedimeve të paqes, thanë burimet. Neë York Times raportoi se Ratcliffe i dha Bortnikov "një vlerësim të zymtë" të gjendjes së luftës dhe i kërkoi Rusisë të arrinte një marrëveshje para se situata e saj të përkeqësohej.