Presidenti ukrainas, Volodymyr Zelensky ka thënë se është i gatshëm të shkojë në Budapest për të diskutuar për paqen, ndonëse ka shprehur dyshime rreth gatishmërisë së presidentit rus, Vladimir Putin për t’i dhënë fund luftës që ka nisur mbi tre vjet më parë. “Nuk jam i sigurt që Putini është gati t’i japë fund luftës”, tha Zelensky në një intervistë për rrjetin televiziv NBC të dielën. “Mendoj se ai dëshiron të vazhdojë agresionin”. Presidenti ukrainas tha se beson që Putini preferon shtyrjen e “negociatave të vërteta për paqe” dhe heziton ta takojë atë, sepse kjo do të nënkuptonte që palët do të duhej të pajtoheshin për pozicione specifike dhe lëshime potenciale për t’i dhënë fund luftës. Zelensky ka bërë thirrje për rritje të presionit ndaj liderit rus, duke thënë se Putini “frikësohet nga sanksionet” dhe se sanksionet sekondare do ta gjunjëzonin ekonominë ruse.