Ukraina i ka kërkuar Turqisë të organizojë një takim mes Presidentit Volodymyr Zelenski dhe Presidentit rus Vladimir Putin, tha diplomati më i lartë ukrainas, ndërsa Kievi kërkon të rigjallërojë bisedimet e paqes që kanë ngecur. "Ne i pyetëm turqit për këtë, ne pyetëm disa kryeqytete të tjera," tha Ministri i Jashtëm ukrainas Andrii Sybiha në një deklaratë për shtyp. Ai shtoi se Ukraina do të ishte gati të merrte në konsideratë çdo vend tjetër përveç Bjellorusisë ose Rusisë për një takim me Putinin, të cilin Zelenski e ka kërkuar prej kohësh për të përshpejtuar një zgjidhje të luftës më shumë se katërvjeçare. Bjellorusia është një aleate e ngushtë e Rusisë dhe i lejoi Moskës të përdorte territorin bjellorus për të nisur pushtimin e saj të plotë të Ukrainës në vitin 2022. Sybiha nuk tha se si Ankaraja i ishte përgjigjur propozimit. "Ne iu drejtuam veçanërisht turqve," tha ai. "Por nëse një kryeqytet tjetër, përveç Moskës dhe Bjellorusisë, organizon një takim të tillë, ne do të shkojmë." Kremlini më herët ka thënë se është i gatshëm ta presë Zelenskin në Moskë, ku udhëheqësi ukrainas ka thënë se nuk do të shkojë. Nga ana tjetër, Sybiha tha se ai kishte shkëmbyer tashmë mesazhe me shkrim me Anita Orban, e cila do të bëhet ministrja e re e jashtme e Hungarisë kur qeveria e re, e cila fitoi zgjedhjet atje në fillim të këtij muaji, të marrë pushtetin. Kryeministri në largim Viktor Orban, kishte ofruar më herët budapestin si një vend pritës për negociatat rusi-ukrainë.