Presidenti i Ukrainës, Volodymir Zelensky zbriti sërish në frontin e luftës, këtë herë për të vizituar ushtarët ukrainas deri në pozicionet më të avancuara të tyre, në Zaporizhia. Lajmin e dha zyra e shtypit e presidentit ukrainas, që shpërndau video dhe foto të takimit, teksa zbuloi edhe mesazhin e Zelenskyt për ushtarët në frontin e luftës. “Kam nderin të jem këtu sot dhe ju falënderoj që mbroni shtetin tonë, të gjithë ne, sovranitetin tonë, qytetet tona, fëmijët tanë”, tha ndër të tjera Volodymyr Zelenskyy gjatë bisedës me ushtrinë. Ai falënderi edhe familjet e ushtarëve, të cilët i quajti heronj të vendit dhe nuk ngurroi t’i nderojë me urdhra të lartë ushtarakë.