Zëdhënësi kryesor i Shërbimit Evropian për Punë të Jashtme, Peter Stano, e mohoi për REL njoftimin e disa mediave në Serbi se Bashkimi Europian është duke përgatitur një ultimatum për Beogradin, në raundin e ardhshëm të bisedimeve me Prishtinën, që do të mbahet më 30 korrik në Bruksel.“Me rregull, ne nuk i komentojmë spekulimet e mediave, por në rastin konkret dua t’i mohoj qartazi spekulimet rreth raundit të nesërm të bisedimeve midis ekspertëve dhe agjendës së tyre”, tha Stano në një përgjigje për Radion Europa e Lirë. Dialogu mes Kosovës dhe Serbisë, i cili ka rinisur në nivelin më të lartë më 16 korrik, vazhdon me një seri të takimeve në nivel ekspertësh, që janë pjesë e procesit. Por duke iu referuar burimeve diplomatike, gazeta serbe “Veçernje Novosti” ka shkruar se delegacionit të Beogradit, i cili të enjten udhëton drejt Brukselit për bisedime me të dërguarin e BE-së në dialogun Kosovë-Serbi, Mirosllav Lajçak, dhe me delegacionin e Kosovës, do t’i dorëzohet një draft-marrëveshje gjithëpërfshirëse, e cila nënkupton njohjen de fakto të Kosovës nga ana e Serbisë. Ministri I jashtëm serb Ivica Dacic tha se Beogradi nuk është në dijeni të faktit që draft-marrëveshja gjithëpërfshirëse do t'iu dorëzohet të dy delegacioneve në Burksel. Ai shtoi se është i bindur që nëse ka një propozim të tillë, presidenti i Serbisë, Aleksandar Vuçiq, do të përgjigjet në përputhje me interesat shtetërore dhe kombëtare. Dacic vazhdoi t`I mëshojë idesë se në tryezën e bisedimeve do të jenë çështje teknike, si ajo e të zhvendosurve dhe ekonomia.