Bashkimi Demokratik për Integrim e ka cilësuar si një nga momentet më shqetësuese në diskursin politik që nga nënshkrimi i Marrëveshjes Paqësore të Ohrit, deklaratën e bërë nga kryeministri i Maqedonisë së Veriut, Hristijan Mickoski në Kuvend lidhur me përdorimin e gjuhës shqipe. Sipas BDI, pretendimi se gjuha shqipe mund të përdoret “sa të doni”, ndërsa si gjuhë zyrtare mbetet vetëm maqedonishtja, vlerësohet si rikthim në logjikën e Kushtetutës së vitit 1991 dhe në nenin e dikurshëm 7, duke injoruar Amendamentin V të vitit 2001, i cili konsiderohet themelor për rendin kushtetues dhe balancën ndëretnike në vend. BDI thekson se një qëndrim i tillë cenon thelbin e Marrëveshjes së Ohrit, e cila sipas tyre nuk është vetëm kompromis politik, por arkitekturë e bashkëjetesës në shtet multietnik. Në reagim thuhet se relativizimi i statusit të gjuhës shqipe përbën rrezik për marrëdhëniet ndëretnike dhe funksionimin e demokracisë multietnike, duke u cilësuar si tentativë për kthim prapa në arritjet kushtetuese. BDI i bën thirrje kryeministrit që të tërhiqet menjëherë nga kjo qasje dhe të respektojë plotësisht rendin kushtetues të dalë nga Marrëveshja e Ohrit, duke theksuar se çdo devijim nga ky parim dëmton bashkëjetesën dhe stabilitetin e shtetit.