Partia Demokratike e Rithemelimit ka reaguar pas vendimit të Prokurorisë së Tiranës për të mbyllur hetimet për dhunimin e Bilbil e Jashar Majës nga anëtarët e fisit Rraja, që solli edhe dorëheqjen e deputetit socialist Rrahman Rraja. Sipas Sekretarit të Përgjithshëm Flamur Noka, Partia Demokratike kërkon rishikimin e kësaj akuze të cilën e konsiderojnë si të turpshme. “Partia Demokratike e konsideron një turp për prokurorinë akuzën e ngritur, e dënon me neveri dhe kërkon rishikimin e saj. Edhe pse presioni i qeverisë, i të fortëve të fisit apo shoqërisë së Rrajave, ka qenë i pranishëm, prokurorët janë të dënuar të japin drejtësi sidomos në raste të tilla kur ceshtjet, para se të shkojnë te organi i akuzës, kanë kaluar nga gjykata e opinionit publik”, thekson ndër të tjera Noka. Sipas tij as në teori literaturë të kriminalistikës, dhuna e ushtruar ndaj Majave nuk mund të përkufizohet si ‘plagosje e lehtë’. “Prokuroria ka dalë haptas kundër asaj që të gjithë shqiptarët kanë parë. Prokuroria ka parë atë që Edi Rama dhe Rrajat kanë dashur që ata të shohin. Në cdo rast tjetër mbetet që Prokuria “kur ka parë paranë, ters e ka vërtitur sherianë”. Akuza e holluar me ujin e zi të korruptimit moral e shpirtëtor është sinjal se Rrajat plagosin rëndë dhe dënohen lehtë. Se ata gëzojnë sërish mbrojtje, të cilën do ta përdorin për kërcënime, krime dhe dhunë”, thekson Noka, teksa shton se Prokuroria ka minuar besimin e publikut.