Një ambient I mbyllur për kultivimin e lëndëve narkotike u zbulua nga policia në Tepelenë. E ashtëquajtura shtëpi bari u zbulua në një banesë në fshatin Veliqot gjatë kontrolleve të ushtruara nga policia por dhe informacioneve të siguruara nga strukturat e inteligjencës. Gjatë aksionit policia tha se gjeti rreth 230 bimë narkotike të mbjella në vazo. Ndërkohë u arrestuan katër persona. Shtëpia e barit ishte ngritur në një shtëpi të pabanuar, ku trafikantët e kishin përshtatur vendin me llamba që furnizoheshin me energji elektrike me qëllim kultivimin e drogës. Grupi hetimor po vijon punën për dokumentimin e plotë të rastit si dhe po kryen kontrolle pasi ka denoncime të shumta për parcela të mbjella me drogë në këtë zonë. Edhe më herët policia ka gjetur në banesa të ndryshme ambiente të përshtatura për prodhimin e kanabisit.