Një ish-modele e ‘Playboy’ dhe ish-të dashura e futbollistit Mario Balotelli, Tabby Brown, ka vdekur pas komplikimeve nga operacionet plastike, zbulon Mail Online. Tabby Brown, 38 vjeçe, ndërroi jetë papritur tetorin e kaluar, vetëm disa ditë pasi u kthye nga Republika Domenikane ku kishte shkuar për trajtim ‘liposuction’. E ndjera ishte gjithashtu aktore dhe valltare. Një hetim i kryer nga mjeku gjyqësor i Londrës së Jugut, Julian Morris, konfirmoi se ajo vdiq nga sindroma e embolisë së yndyrës (FES), një gjendje e rrallë që u shkaktua nga ‘liposuction’. Sipas revistave mjekësore, vdekjet nga FES pas operacioneve plastike janë të rralla, por raste të tilla kanë qenë në rritje. Gjykata dëgjoi se Tabby kishte udhëtuar në Amerikën e Jugut dhe Republikën Domenikane dy javë para se të vdiste, megjithëse nuk dihet me saktësi se ku e kishte kryer operacionin. Ajo vdiq tre ditë pas kthimit në Britani. ‘Liposuction’ është një procedurë kozmetike që përfshin heqjen e yndyrës së padëshiruar nga pjesë të ndryshme të trupit, përfshirë ijët, kofshët dhe barkun. Kjo procedurë nuk ofrohet lehtësisht nga NHS dhe operacionet private në MB mund të kushtojnë nga 3,000 deri në 8,500 funte, në varësi të vendit ku kryhet dhe zonave të trupit që trajtohen.Edhe pse nuk dihet me siguri nëse Tabby e bëri operacionin në Republikën Domenikane, atje ka klinika të shumta dhe konkurrenca e madhe midis kirurgëve i çon çmimet në gjysmën e atyre që janë në Britani.