Pasaporta më e fuqishme në botë është zbuluar në Indeksin e Pasaportave Henley. Renditja tremujore mat se sa e fortë është një pasaportë, bazuar në numrin e vendeve ku ajo siguron akses pa viza. Indeksi i Pasaportave Henley analizon të dhënat nga Autoriteti Ndërkombëtar i Transportit Ajror dhe shqyrton 199 pasaporta të ndryshme dhe 227 destinacione. Dhe pasaporta më e fuqishme në botë është ajo e Singaporit, e cila u jep mbajtësve të saj akses në 193 destinacione në të gjithë botën. Në vendin e dytë është Koreja e Jugut, me hyrje në 190 vende e ndjekur nga Japonia, me 189. Në vendin e katërt, me akses pa viza në 188 vende, janë Gjermania, Italia, Luksemburgu, Spanja dhe Zvicra. Në vendin e pestë, me pikë të barabarta dhe me akses në 187 vende, janë Austria, Belgjika, Danimarka, Finlanda, Franca, Irlanda dhe Holanda. Ndërkohë, Mbretëria e Bashkuar ka rënë nga vendi i gjashtë në të tetin, ku është e barabartë me Kroacinë, Estoninë, Sllovakinë, Slloveninë dhe Emiratet e Bashkuara Arabe. Të gjitha këto pasaporta ofrojnë akses të lehtë në 184 vende dhe territore nga 224 të ndjekura nga indeksi.