Një grup shkencëtarësh thonë se kanë zbuluar krejt rastësisht atë që ata besojnë se është ishulli më verior i botës, përtej brigjeve të Groenlandës. Në korrik, shkencëtarët fluturuan për të mbledhur kampionë të asaj që ata mendonin se ishte ishulli Oodaaq, i njohur që në 1978-ën. Por, kur ata kontrolluan pozicionin me zyrtarin danez të ngarkuar për regjistrimin e ishujve në arktik, ata zbuluan se ndodheshin 800 metra më në veri. Ishulli me përmasa 60-30 metra është pika më e afërt e tokës me polin e Veriut – thanë kërkuesit. Groenlanda është një territor i gjerë autonom në arktik që i përket Danimarkës. Ishulli u zbulua gjatë një ekspedite të përbashkët danezo-zvicerane. “ne donim që ndër të tjera të vizitonim ishullin Oodaaq, që më herët njihej si ishulli më verior i botës. Ishim gjashtë persona në një helikopter të vogël, dhe kur ne arritëm në pozicionin e ishullit Oodaaq, nuk mundëm ta gjenim. Ndaj nisëm të kërkonim ishullin. Pas disa minutash, pamë një copë tokë pa bimësi, rrethuar me akull në të gjitha anët. Dhe rezultoi se ai ishte një ishull i panjohur më parë”, thanë kërkuesit. Tani ata duan ta quajnë ishullin Qeqertaq Avannarleq, që do të thotë në gjuhën vendase, ishulli më verior. Groenlanda ka pushtuar faqet e para të gazetave disa herë këto vitet e fundit me ish presidentin Donald Trump që tha në 2019-ën se SHBA donte ta blinte territorin. Danimarka menjëherë e hodhi poshtë idenë, duke e quajtur absurde, por interesi ndërkombëtar në të ardhmen e Groenlandës ka vijuar.