Policia australiane thotë se bomba artizanale u hodhën drejt një turme në plazhin Bondi para të shtënave masive, por nuk shpërthyen, sipas dokumenteve të gjykatës të publikuara të hënën. Pesëmbëdhjetë persona u vranë dhe dhjetëra të tjerë u plagosën në të shtënat masive në një festë hebraike në plazhin Bondi më 14 dhjetor. Sulmi ka tronditur Australinë dhe ka ndezur thirrje për ligje më të ashpra për armët dhe për të shtuar përpjekjet për të ndaluar antisemitizmin. Një nga autorët, Sajid Akram, 50 vjeç, i cili u qëllua për vdekje nga policia, zotëronte gjashtë armë zjarri. Djali i tij 24-vjeçar, Naveed Akram, është akuzuar për 59 vepra penale, përfshirë vrasje dhe terrorizëm, sipas policisë. Autorët sipas policisë e kishin planifikuar sulmin prej disa muajsh dhe kishin vizituar plazhin Bondi për zbulim dy ditë më parë. Fotografitë e përfshira në raportin e policisë treguan babain dhe djalin që dyshohet se stërviteshin me armë zjarri në një pjesë rurale të izoluar të Uellsit të Ri Jugor, shtetit më të populluar të Australisë që përfshin Sydneyn. Policia gjeti një video të bërë në tetor në celularin e njërit prej personave të armatosur, ku ata shiheshin të ulur para një flamuri të Shtetit Islamik dhe duke bërë deklarata në anglisht rreth arsyeve të sulmit, ndërsa dënonin aktet e sionistëve.