Dy vajza, një 19-vjeçare dhe tjetër vetëm 17-vjeç, përfunduan në prangat e policisë pasi bullizonin dhe shpërndanin foto dhe shkrime me përmbajtje denigruese në platformën online Instagram për vajza të ndryshme të mitura në Korçë. Operacioni i koduar CyberShield u zhvillua pas një denoncimi të bërë lidhur me hapjen e një profili social, ku publikoheshin shkrime me natyrë bullizuese, denigruese, si dhe shpërndaheshin foto dhe video intime të vajzave të mitura, nxënëse të shkollave të ndryshme në qytetin e Korçës. Dy administratoret e faqes u zbuluan pas bashkëpunimit të drejtorisë së hetimit kibernetik me me kompanitë ndërkombëtare Meta Inc. dhe Google Inc. Ato akuzohen për veprën penale Pornografia me të mitur. 19-vjeçarja sipas policisë ishte administratorja e profilit të krijuar në rrjetin social Instagram, ku publikoheshin materiale me përmbajtje bullizuese dhe denigruese. Kurse 17-vjeçarja, u identifikua si person përgjegjës për aplikacionin “Tellonym”, i lidhur me profilin e Instagramit. Policia paralajmëron ndëshkim për të githë ata persona që përpiqen të dëmtojnë dëmijët dhe të rinjtë në platformat online.