Zbardhet pas 7 vitesh një krim i rëndë në Voskopojë, i cili për një kohë të gjatë u hetua. Gjykata e Korçës ka caktuar masën e sigurisë "arrest me burg" në mungesë për Kejsi Spahillarin, e cila akuzohet për vrasjen me dashje në bashkëpunim të të dashurit të saj, Antonio Karafili. Ngjarja ka ndodhur në vitin 2018, kur trupi i pajetë i 18-vjeçarit u gjet i varur me një çarçaf në një pemë në periferi të fshatit. Në atë kohë, rasti u hetua si vetëvrasje. Por hetimet e mëvonshme të Prokurorisë së Korçës kanë zbuluar se bëhej fjalë për një vrasje të planifikuar. Sipas provave të mbledhura, Antonio Karafili dyshohet se është mbytur nga Kejsi Spahillari në bashkëpunim me të dashurin e saj Rexhep Vathi. Pas mbytjes, trupi i tij u var në pemë për të inskenuar vetëvrasjen. Si motiv i krimit dyshohet të jetë lidhja paralele e Spahillarit me të dy djemtë. Pas ngjarjes, Kejsi Spahillari u largua drejt Kanadasë ku jeton prej vitesh dhe ka krijuar familje. Ndërkohë, në gusht të vitit 2024, Rexhep Vathi dyshohet se i dha fund jetës. Prokuroria e Korçës ka lëshuar urdhër-arrest për Kejsi Spahillarin dhe pritet të nisë procedurat për shpalljen e saj në kërkim ndërkombëtar. Ajo akuzohet për "vrasje me dashje në bashkëpunim", ndërsa hetimet për zbardhjen e plotë të krimit vijojnë.