Një deklaratë e ish-oficerit të Central Intelligence Agency, John Kiriakou, ka nxitur reagime pasi ai pretendon se një sulm amerikan ndaj Iranit mund të ndodhë brenda fillimit të javës. Sipas tij, informacionin e ka marrë nga një ish-koleg në Shtëpinë e Bardhë. Ai i bëri komentet në një intervistë të transmetuar më 22 shkurt, teksa i referohej afatit 10-ditor që presidenti amerikan i ka vendosur Teheranit për t’iu përmbajtur kushteve të Uashingtonit, përfshirë ndalimin e programeve raketore dhe bërthamore, si dhe ndërprerjen e mbështetjes për grupet aleate në rajon. Sipas ish-agjentit, brenda administratës amerikane ka ndarje sa i përket një ndërhyrjeje të mundshme ushtarake. Ai pretendon se një kamp kundër luftës përfshin zëvendëspresidentin JD Vance, ndërsa krahu që mbështet ndërhyrjen udhëhiqet nga sekretari i Shtetit Marco Rubio. Ish-oficeri , i cili më herët ka vuajtur dënim me burg për zbulimin e praktikave të CIA-s, sugjeroi gjithashtu se disa njoftime publike mund të përdoren për të larguar vëmendjen nga vendime të rëndësishme ushtarake. Deri tani, autoritetet amerikane nuk kanë reaguar zyrtarisht ndaj këtyre pretendimeve.