Zbardhet dëshmia, e cila çoi në pranga ish drejtoreshën e konçesioneve në ministrinë e financave, Alda Klosi në kohën kur ministër ishte Arben Ahmetaj. Në dëshminë e saj pastruesja, Rozeta Dobi ka treguar për hetuesit se ajo ka nisur punë në vitin 2018 në një banesë që ndodhet në zonën e "Mozaikut" të Tiranës. Dobi është shprehur se në atë kohë, ka gjetur sipër krevatit të mbuluar me batanije shuma të mëdha parash. "Nuk i numërova, por ishin shumë para. I mora ato dhe i vendosa në siratrin e komodinës që ndodhej në krevatin ku flinte Alda. Më pas e mora atë në telefon, ku i tregova edhe vendin se ku i kisha futur, ku ajo më falenderoi për veprimin", mësohet se ka deklaruar përpara hetuesve sanitarja. Më tej ajo shton se ish zyrtarja Alda Klosi u transferua në një tjetër banesë familjarisht, ku Dobi gjatë punës së saj konstatoi disa kuti me euro. Ajo është shprehur se nuk i ka numëruar, por vlerat monetare ishin shumë të mëdha.