Kryeministri Edi Rama publikoi mesazhe të qytetarëve që ankohen për zaptimin e hapësirave publike, nga biznese private që kanë vendosur tenda, karrige dhe tavolina në trotuare duke vështirësuar lëvizjen e qytetarëve. Kreu i ekzekutivit i paralajmëroi të gjithë ata që po cënojnë pronën publike që të heqin vetë të gjitha objektet pasi në të kundërtën do të përballen jo vetëm me gjoba por edhe me ndjekje penale për shkatërrim të pronës publike dhe cënim të shëndetit e sigurisë fizike të qytetarëve. “Koha për t’u bërë bashkë që të gjithë në emër të bashkëjetesës në të njëjtën lagje; shumica duke marrë mbrapsht atë që i takon dhe pakica duke kthyer mbrapsht atë që nuk i takon!” – shprehet kryeministri Edi Rama. Deputetët aktualë dhe ata të rinj së bashku me përfaqësues të bashkisë së Tiranës janë ndarë në grupe, dhe gjatë këtyre dy javëve do të përgatisin invetarë për problematikat e konstatuara në kryeqytet jo vetëm sa i takon zaptimit të hapësirave publike por edhe shërbimeve bashkiake dhe trafikut. Në dy javët e fundit të muajit korrik pritet që adresimi të bëhet duke angazhuar në terren inspektorët dhe policinë bashkiake. Ndërkohë turi i Ramës nëpër bashki, që filloi me Vlorën dhe Tiranën do të vijojë edhe në Fier, Elbasan, Durrës e Shkodër.