Dëshmitë fillestare të të shoqëruarve dhe të arrestuarve nga policia për rastin e vrasjes së 20-vjeçarit portugez në Ksamil kanë zbuluar zanafillën e sherrit fatal për të riun. Mes personave që kanë folur, por shkurtimisht është edhe autori i dyshuar i vrasjes, Sokrat Vata. Në deklarimet paraprake ai është shprehur se sherri fillimisht mes turistëve, të cilët kanë qenë nën efektin e alkoolit. Sipas autorit turistëve u është kërkuar të mbajnë qetësi pasi lokali kishte edhe klientë të tjerë. Vendosja e qetësisë ka qenë e pamundur, tha ai, dhe ka nisur përplasja fizike mes tyre. Sipas Vatës, thika me të cilin është kryer krimi ka qenë e viktimës. Dëshmia e tij nuk përputhet plotësisht me të dhënat e tjera që ka grumbulluar grupi hetimor, mes të cilave edhe pamjet e kamerave të sigurisë. Nga këto të dhënat, sherri dyshohet se ka nisur nga 29-vjeçari David Heurtevent, shqiptar me shtetësi britanike dhe banues në Tiranë. 29 vjeçari dyshohet se ka qenë personi që është konfliktuar i pari me turistin portugez. Sipas hetimeve, Heurtevent e ka goditur 20-vjeçarin me grushte, ndërsa më pas në përleshje janë përfshirë edhe pjesëtarë të tjerë të stafit të lokalit, të cilët dyshohet se kanë vijuar ta godasin të riun. Më pas, sipas policisë, Sokrat Vata e ka goditur disa herë me thikë, duke i shkaktuar plagët fatale.