Dy të dërguarve të presidentit amerikan, Donald Trump, në Moskë, iu dha trajtim i plotë VIP gjatë vizitës së tyre. Pati një autokolonë makinash që i shoqëruan nga aeroporti, drekë në një restorant me yje Michelin dhe madje edhe një shëtitje rreth Sheshit të Kuq. Dukej sikur Steve Ëitkoff dhe Jared Kushner ishin më shumë në një vizitë turistike sesa në kërkim të paqes. Më në fund ata përveshën mëngët për punë, në Kremlin, më shumë se gjashtë orë pasi mbërritën në Rusi. Dhe në atë pikë, ishte tashmë e qartë se e vetmja gjë për të cilën kishin ardhur në Moskë nuk ishte në tryezë: pajtimi i Rusisë me planin e tyre të fundit të paqes. Sipas Vladimir Putin, gjithçka është faji i Evropës. Ndërsa mysafirët e tij po drekonin, ai ishte i zënë duke akuzuar aleatët e Ukrainës për bllokimin e procesit të paqes duke imponuar kërkesa që janë të papranueshme për Rusinë. Evropianët, sigurisht, do të thoshin se ndodh e kundërta. Por aty ku kishte armiqësi ndaj Evropës, kishte edhe mikpritje ndaj amerikanëve, pjesë e strategjisë së Rusisë për të distancuar SHBA-në nga aleatët e saj të NATO-s dhe për ta kthyer atë në anën e Moskës. Një transmetim i shkurtër video nga Kremlini tregoi dy delegacionet e ulura në anët e kundërta të një tavoline ovale të bardhë, me Putinin të ulur pranë këshilltarëve të tij Kirill Dmitriev dhe Yuri Ushakov. Putin i pyeti Ëitkoff dhe Kushner për turneun e shkurtër në Moskë, para takimit, me Ëitkoff që e quajti atë një "qytet madhështor". Transmetimi më pas u ndërpre.