I dërguari special i Presidentit amerikan Donald Trump, Steve Ëitkoff, dhe dhëndri i tij Jared Kushner takohen në Moskë me Presidentin rus Vladimir Putin për bisedime mbi një mënyrë të mundshme për t'i dhënë fund konfliktit më vdekjeprurës në tokë evropiane që nga Lufta e Dytë Botërore. Trump ka thënë vazhdimisht se dëshiron t'i japë fund luftës në Ukrainë por përpjekjet e tij deri më tani, përfshirë një samit me Putinin në Alaskë, në gusht, ende nuk kanë sjellë paqe. Një draft me 28 pika, i prezantuar nga SHBA u shfaq javën e kaluar, duke trembur zyrtarët ukrainas dhe evropianë të cilët mendonin se ai ishte shkruar nga Moska. Fuqitë evropiane më pas dhanë kundërpropozimin e tyre për paqe dhe në bisedimet në Gjenevë, SHBA dhe Ukraina thanë se kishin krijuar një "kornizë paqeje të përditësuar" për t'i dhënë fund luftës. Putin ka thënë se diskutimet deri më tani nuk kanë të bëjnë me një draft marrëveshje, por me një sërë propozimesh që ai tha javën e kaluar se "mund të jenë baza për marrëveshjet e ardhshme".