Megjithëse Uashingtoni është qendra e pushtetit politik në vend, banorët e tij nuk kanë të drejtë vote në Kongres dhe as të veteqeverisen, për shkak të statusit të tij të veçantë si njësi e varur nga qeveria federale. Por përkrahësit e iniciativës për ta bërë Uashingtonin shtet, thonë se aktualisht shohin më shumë potencial se kurrë për ta arritur këtë qëllim. Kur protestuesit sulmuan Kapitolin në një përpjekje të dështuar për të bllokuar Kongresin që të çertifikonte fitoren në zgjedhjet presidenciale të demokratit Joe Biden, Kryetarja e Bashkisë së Uashingtonit Muriel Boëser nuk gëzonte autoritetin për të thirrur Gardën Kombëtare në ndihmë të policisë. Ngjarja i ka dhënë vrull përpjekjeve të gjata që kryeqyteti i vendit të bëhet shtet. Kryeqytetit i mungon autonomia lokale. Në ndryshim nga shtetet e tjera, buxheti dhe ligjet lokale, janë në varësi të miratimit nga Kongresi. Banorët e kryeqytetit paguajnë taksa federale, por nuk kanë një përfaqësues në Kongres që të votojë në emër të tyre. Zyrtarët lokalë kanë prezantuar një ligj që u miratua nga Dhoma e Përfaqësuesve vitin e kaluar, i cili do të tkurrte qarkun federal në rreth 5 kilometra katrorë duke përfshirë Kapitolin, Shtëpinë e Bardhë, ndërtesat e tjera kryesore qeveritare si dhe monumentet. Pjesa tjetër prej rreth 170 kilometrash katrorë do të bëhej një shtet i ri. Legjislacioni u riprezantua në janar dhe gëzon edhe më shumë mbështetës. Por republikanët e Kongresit e kundërshtojnë çështjen e shtetësinë. Për shkak se votuesit e këtij qarku mbështesin në shumicë dërrmuese demokratët kjo do të nënkuptonte dy demokratë të tjerë në një Senat tashmë të ndarë në mënyrë të barabartë mes dy partive. Një komision i Dhomës së Përfaqësuesve pritet të shqyrtojë ligjin këtë muaj. Ndërsa ligji mund të miratohet në këtë dhomë të kontrolluar nga demokratët, nuk ka shumë të ngjarë që e njëjta gjë të ndodhë në Senat, ku demokratët gëzojnë kontrollin me një diferencë të vogël.