Kandidatët për zëvendëspresident të Shteteve të Bashkuara, demokrati Tim Walz dhe republikani J.D. Vance, u përplasën për krizën në Lindjen e Mesme, imigracionin, taksat, abortin, ndryshimet klimatike dhe ekonominë. Ëalz, i zgjedhuri i kandidates për presidente, Kamala Harris, dhe Vance, i zgjedhur nga kandidati republikan, Donald Trump, zhvilluan të martën debatin e parë kombëtar televiziv të tyre. Dy rivalët i përqendruan kritikat jo edhe aq te njëri-tjetri, por më shumë te shefat e tyre. Vance pyeti se përse Harris nuk bën më shumë për të trajtuar inflacionin, imigracionin dhe ekonominë, ndërsa shërben si zëvendëse e presidentit aktual, Joe Biden. “Nëse Kamala Harris ka plane aq të shkëlqyera për trajtimin e problemeve të klasës së mesme, atëherë ajo duhet t’i realizojë ato tani. Jo ndërsa përpiqet të promovohet, por në mandatin që populli amerikan i ka dhënë tre vjet e gjysmë më parë”, tha Vance. Ëalz në anën tjetër e përshkroi ish-presidentin Trump si udhëheqës të paqëndrueshëm, i cili, siç tha ai, u ka dhënë përparësi miliarderëve. Ai e kritikoi atë për presion ndaj republikanëve në Kongres, për të hequr dorë nga një projekt-ligj dypartiak për sigurinë kufitare, më herët këtë vit. “Shumica prej nesh duam ta zgjidhim këtë”, tha Ëalz për imigracionin. “Donald Trump kishte katër vjet kohë për ta bërë këtë dhe nuk e bëri”, tha Walz. Debati në Qendrën e Transmetimeve të CBS-it në Nju Jork u mbajt në ditën kur kriza në Lindjen e Mesme u përshkallëzua dukshëm, pasi Izraeli vazhdoi sulmet në Libanin jugor dhe Irani, në shenjë hakmarrjeje, sulmoi me raketa Izraelin. Dhe sigurisht që tema ishte qendrore në debat. Të pyetur nëse do t’i mbështesnin sulmet parandaluese të Izraelit kundër Iranit, Vance tha se do t’i bindej gjykimit të Izraelit, ndërsa Ëalz nuk iu përgjigj drejtpërdrejt pyetjes.