Një shkëmbim të shtënash ka ndodhur mes ushtarëve rusë dhe mercenarëve të grupit Vagner, në lidhje me kë duhet fajësuar për dështimet e rusisë në mesin e pushtimit të ukrainës, thanë autoritetet ushtarake nga Kievi të dielën. Presidenti rus Vladimir Putin, nisi atë që ai e quan operacion special ushtarak në ukrainë, shkurtin e kaluar. Kremlini kërkonte një fitore të shpejtë në ukrainë, që kishte një ushtri më të vogël dhe më pak të fuqishme se Rusia. Sidoqoftë, pas më shumë se një viti luftë, Moska nuk ka mundur të arrijë objektiva të rëndësishëm të saj për shkak të ndihmës ushtarake që i është dhënë Ukrainës. Luftimet mbeten të përqendruara në pjesët lindore të vendit, që shpejt mendohet se do të nisë një kundërsulm për të rimarrë tokat e pushtuara. Në mesin e humbjeve në rritje në fushëbetejë, shtabi i përgjithshëm i forcave ushtarake të Ukrainës, tha të dielën se tensionet mes forcave ruse dhe mercenarëve të Vagnerit, janë rritur shumë në lidhje me mosmarrëveshjen përse rusia nuk po arrin sukses. “Pa asnjë arritje domethënëse në fushëbetejë, forcat e armatosura ruse dhe grupi vagner po përpiqen të gjejnë dikë që të fajësojnë për disfatën”, thuhet në buletinin e ushtrisë së kievit. “Ata ia hedhin përgjegjësitë për keqllogaritjet e tyre taktike dhe humbjet e pësuara njëri tjetrit. Si rezultat, një përplasje mes forcave të armatosura ruse dhe mercenarëve të Vagnerit ka shpërthyer në stanytsia Luhanska së fundmi”. Përplasja më pas është përshkallëzuar në të shtëna me armë zjarri, me një numër të paspecifikuar viktimash nga të dyja palët – sipas shtabit të përgjithshëm. Më shumë detaje për përplasjen e supozuar, përfshirë kohën kur ka ndodhur dhe sa ushtarë janë vrarë, nuk janë bërë të njohura.