Deputeti shqiptarë në Kuvendin e Serbisë, Shaip Kamberi duke komentuar protestat e studentëve në Serbi, në të cilat po marrinë pjesë me mijëra protestues, ka thënë se presidenti i Serbisë, Aleksandar Vuçiç, duke demonizuar jo vetëm fqinjët, por edhe studentët që nuk i përkulen, ka filluar një retorikë kërcënuese. Sipas deputetit shqiptar, Vuçiç po kërcënon me përdorimin e “Kobrave”-njësitit special të ushtrisë së Serbisë, në përgjegjësinë e të cilëve është edhe mbrojtja e presidentit, se do t’i përdorë për të “shkatërruar protestat”. “Për Vuçiqin, dy student serb të lindur në vitin 2002 në Beograd, me prejardhje nga Kroacia, janë të dërguarit e Zagrebit për të destabilizaur Beogradin. Davudi nga Novi Pazari po ndërlidhet me Bosnën, studentët e Podgoricës me Gjukanoviqin, e Prishtina fajsohet që po përkrahë protestat. “I keni duart e lyera me gjak”, në fakt nuk është vetëm një parullë që ndërlidhet me tragjedinë e Novi Sadit. Ajo paraqet një simbolikë edhe më të gjerë”, ka shkruar ai. Sipas Kamberit, Vuçiç për të shpëtuar veten po tenton të fajësojë këdo dhe të luajë si inkuizitor, ku vetë të akuzon e vetë të gjykon.