Kryetarja e Komunës së Preshevës, Ardita Sinani, reagoi pas vizitës së presidentit të Serbisë Aleksandar Vuçiç në Preshevë. Ajo tha se shqiptarët e Preshevës janë këtu: janë qytetarë, kanë nevoja dhe të drejta, duke theksuar se nuk do të pranojnë të trajtohen si qytetarë të dorës së dytë ose që nuk ekzistojnë fare. “Presheva nuk është vetëm një pjesë e hartës që vizitohet kur dikujt i duhet. Presheva është shtëpia e qytetarëve që kërkojnë të njëjtën vëmendje, të njëjtat të drejta dhe të njëjtin trajtim nga shteti. Çdo investim në Komunën e Preshevës është i mirëseardhur. Ne nuk kemi qenë dhe nuk do të jemi kundër asnjë investimi që përmirëson jetën e qytetarëve tanë. Por sot, pas vizitës së Presidentit Vuçiq në Preshevë, nuk mund të mos them atë që qytetarët e mi e shohin dhe e përjetojnë çdo ditë: Presheva nuk mund të ketë dy standarde” thotë Sinani. Ne, si Komunë, nuk i ndajmë qytetarët sipas përkatësisë etnike – vijon ajo duke përmendur me radhë projektet e shumta të realizuara. Të njëjtin standard që zbatojmë ne, kemi të drejtë ta kërkojmë edhe nga shteti, tha Sinani. Në Preshevë jetojnë shqiptarë, serbë, romë dhe qytetarë të komuniteteve të tjera. Ne duam që secili të jetojë më mirë. Por kjo nuk mund të përdoret si arsyetim për ta bërë shqiptarin të padukshëm para shtetit”, shtoi Sinani duke kërkuar barazi. “Ne nuk kërkojmë privilegje. Kërkojmë barazi. Nuk kërkojmë më shumë se të tjerët. Kërkojmë të mos marrim më pak. Nuk jemi kundër zhvillimit të askujt. Jemi kundër diskriminimit të kujtdo. Presheva është një komunë. Qytetarët e saj janë qytetarë të barabartë” tha kryetarja e Preshevës.