Presidenti i Serbisë, Aleksandar Vuçiç, ka njoftuar se i ka dërguar një letër sekretarit të përgjithshëm të NATO-s, Mark Rutte, lidhur me çështjen e urës së Ibrit në Mitrovicë. Vuçiç tha se në letër i ka kërkuar NATO-s që “të mos lejojë hapjen e urës së Ibrit”, duke argumentuar se kjo çështje lidhet me dialogun ndërmjet Kosovës dhe Serbisë. Sipas tij, për këtë çështje shefi i Shtabit të Përgjithshëm të Ushtrisë së Serbisë, Milan Mojsiloviq, ka zhvilluar gjithashtu një bisedë “shumë të vështirë” me komandantin e KFOR-it, Ozkan Ulutash. “Ne u kërkuam atyre të mos e lejojnë hapjen e urës, sepse kjo gjithmonë ka qenë një temë e dialogut”, deklaroi Vuçiç. Ura kryesore mbi lumin Ibër në Mitrovicë është rikthyer sërish në vëmendje, teksa mbetet një nga pikat më të ndjeshme në marrëdhëniet mes Kosovës dhe Serbisë. Çështja e hapjes së saj është kundërshtuar vazhdimisht nga Beogradi, ndërsa autoritetet në Kosovë e kanë konsideruar hapjen e saj si pjesë të procesit të normalizimit dhe integrimit të veriut. Po ashtu, kjo temë është diskutuar edhe në kuadër të dialogut Kosovë-Serbi dhe është nën vëmendjen e KFOR-it, i cili ka përgjegjësi për ruajtjen e një mjedisi të sigurt në Kosovë.