Një fitore të madhe dhe të rëndësishme për Serbinë e ka quajtur presidenti Vuçiç rezultatin e arritur nga Lista Serbe në zgjedhjet e 9 shkurtit. Ai tha se tregoi “përkushtimin e fortë të popullit serb për t’i ruajtur vatrat e tyre dhe për t'u mbështetur te Serbia e tyre”. "Ata [serbët në Kosovë] kanë një president të tyre, një atdhe të tyre dhe atë atdhe, Serbinë, e duan më shumë se çdo gjë në botë. Jam pafundësisht mirënjohës ndaj tyre dhe ata kanë treguar se si një popull sillet në mënyrë të përgjegjshme dhe serioze në një situatë të vështirë”, tha Vuçiq gjatë një interviste për televizionin Pink. Vuçiç tha se “nuk dëshiron” të spekulojë apo “të ndërhyjë në marrëdhëniet ndërshqiptare”, por se kushdo që do ta formonte një qeveri me Albin Kurtin “do të ishte i vdekur politikisht”, shkruan Radio Evropa e Lirë. Ai shtoi se Lista Serbe “me gjithë dobësitë, mangësitë dhe gabimet e saj, ka arritur të fitojë besimin më të madh të serbëve” në Kosovë.