Parlamenti Evropian miratoi këtë të mërkurë një rezolutë lidhur me polarizimin dhe represionin në Serbi, duke mbështetur protestën e studentëve dhe qytetarëve ndërsa dënoi ashpër dhunën e ushtruar nga autoritetet, arrestimet dhe frikësimin ndaj protestuesve. Rezoluta mori mbështetjen e 457 ligjvënësve. Ndërsa 103 votuan kundër dhe 72 abstenuan. Në rezolutën “për polarizimin dhe rritjen e represionit në Serbi, një vit pas tragjedisë së Novi Sadit”, thuhet se udhëheqja serbe është politikisht përgjegjëse për përshkallëzimin e represionit, normalizimin e dhunës dhe dobësimin e institucioneve demokratike në vend. Përmes kësaj nisme PE dënon hapur veprimet e partisë Progresive Serbe për ngritjen e kampit me tenda në Parkun Pioner si dhe për veprimet e ndjekura. Në rezolutë, thuhet gjithashtu se eurodeputetët mbështesin dërgimin e një misioni ad hoc për verifikimin e fakteve në Serbi, me pjesëmarrjen e Parlamentit Evropian, dhe i bëhet thirrje Komisionit Evropian të ndërmarrë një nismë për sanksione që do të shënjestronin personat përgjegjës për shkelje të rënda të ligjit dhe të drejtave të njeriut në Serbi. Komisionarja evropiane për Zgjerim, Marta Kos, gjatë debatit të së martës, tha se Bashkimi Evropian pret që veprimet policore dhe sjellja gjatë protestave të jenë proporcionale dhe që të respektohen të drejtat themelore të njeriut, raporton Radio Evropa e Lirë. Brukseli gjithashtu dënon çdo akt urrejtjeje, vandalizmi apo dhune gjatë protestave dhe u bën thirrje të gjitha palëve të ulin tensionet.