Studentët serbë i kanë dhënë fund një bllokade dyjavore të ndërtesave të transmetuesit publik në Beograd, pasi parlamenti ndërmori hapa konkretë drejt një prej kërkesave të tyre kryesore, shpalljen e zgjedhjeve për anëtarët e Autoritetit Rregullator për Mediat Elektronike. Protestat e studentëve, që prej muajsh kanë përfshirë vendin, shpërthyen pas tragjedisë së ndodhur në nëntor në Novi Sad, ku 16 persona humbën jetën si pasojë e shembjes së një çatie në një stacion hekurudhor. Ngjarja nxiti zemërim të thellë publik lidhur me korrupsionin dhe mungesën e mbikëqyrjes në projektet infrastrukturore. Nga 14 prilli, studentët, të mbështetur nga qytetarë dhe disa figura akademike, kishin bllokuar hyrjet e dy zyrave të Radio Televizionit të Serbisë në Beograd, si dhe për një ditë selinë e Radio Televizionit të Vojvodinës në Novi Sad. Ata akuzuan transmetuesit shtetërorë për mosraportim të drejtë mbi protestat dhe kërkuan transparencë në përzgjedhjen e organit mbikëqyrës të mediave. Vendimi i komisionit parlamentar për të thirrur zgjedhje të reja për Autoritetin Rregullator për Mediat Elektronike u prit me entuziazëm nga protestuesit. Megjithatë, Radio Evropa e Lorë raporton se protestuesit theksojnë se beteja nuk ka përfunduar. “Nuk është një fitore e plotë, por kemi arritur një hap të rëndësishëm”, mësohet të kenë thënë studentët.