Gjykata e Apelit në Tiranë ka lënë në fuqi vendimin e gjykatës së Shkallës së Parë të Lezhës për dënimin përjetë të Kristjan Cenajt, të akuzuar për vrasjen e 16 vjeçarit Mariglen Gjonaj në Mamurras. Prokuroria kishte kërkuar edhe “aplikimin e periudhës së sigurisë” që nënkupton se “edhe pasi të bënte 35 vite burg të mos i jepej mundësia për lirim me kusht”, por kjo nuk u pranua nga gjykata. Përfaqësuesit ligjorë të familjes Gjonaj kërkuan zgjerim të hetimeve, pasi në këtë krim pretenduan ata, janë të përfshirë dhe persona të tjerë. I mituri u zhduk pa gjurmë në 2017, ndërkohë që autori e kishte groposur trupin në zonën e Fushë-Kuqes dhe u gjet pas 7 vitesh. Cenaj u shpall fajtor për akuzën e “vjedhjes me pasojë vdekjen”, ndërsa ngjarja dyshohet se ndodhi për një orë Rolex që mbante i mituri dhe që autori sipas hetimeve e vrau për t’ia grabitur.