Detaje të reja janë zbardhur lidhur me ngjarjen e rëndë ku mbeti i vrarë 66-vjeçari Rexhep Ismaili në ambientet e një karburanti. Sipas informacioneve paraprake, zanafilla e konfliktit dyshohet të ketë qenë një çështje pronësie mes palëve. Nga të dhënat e para rezulton se pas një konflikti të ndodhur disa ditë më parë, autori i dyshuar, Lulëzim Tabaku, ka shkuar i armatosur në ambientet e karburantit dhe ka qëlluar me pistoletë ndaj Ismailit, i cili ndodhej në lokalin e biznesit të tij, së bashku me persona të tjerë. Autori ka qenë i shoqëruar edhe nga një tjetër person, ndërsa kanë shkuar në karburantin e vëllezërve “Ismaili” për t’u sqaruar lidhur me konfliktin, por debati ka degraduar në përplasje fizike. Burime bëjnë me dije se nga ana e personave që ndodheshin në lokal është nxjerrë një armë automatike, me qëllim goditjen e autorit dhe personit që e shoqëronte.