Një 25-vjeçar shqiptar, banues në Torino, është vrarë me armë zjarri në orët e para të mëngjesit të së dielës në Itali. I riu dyshohet se ishte pjesë e një grupi që kishte hyrë në pronën e një banese me qëllim grabitjen. Sipas mediave italiane, rreth orës 02:00, të paktën 5 persona kanë hyrë në oborrin e banesës. Pronari, i cili ndodhej i vetëm në shtëpinë, ka dëgjuar zhurmat dhe ka dalë jashtë për të parë se çfarë po ndodhte. Pasi ka kuptuar se kishte rënë pre e një grabitjeje, ai ka marrë pistoletën gjysmëautomatike që e posedonte në mënyrë të ligjshme dhe ka qëlluar disa herë ndaj personave. Njëri prej tyre, 25-vjeçari shqiptar, është goditur nga plumbat dhe ka mbetur i vdekur në vend. Identiteti i tij nuk është bërë ende publik. Personat e tjerë janë larguar me shpejtësi nga vendngjarja pas të shtënave. Policia dhe autoritetet italiane kanë nisur hetimet për të rindërtuar me saktësi dinamikën e ngjarjes, përfshirë rrethanat në të cilat është përdorur arma dhe identifikimin e personave të tjerë që dyshohet se kanë qenë pjesë e grupit.