Një krim i rëndë tronditi Elbasanin mesditën e kësaj të enjteje. Ngjarja ndodhi në dyert e Gjykatës në një orë dhe zonë tejet të populluar. Koço Buzo, 58 vjeç, ish-efektiv policie qëlloi me mbi 11 plumba ish-bashkëshorten e tij, Liljana Buzo, 54 vjeçe e cila për fat të keq nuk mundi që t’ju shpëtojë plagëve të marra. Ajo u dërgua me urgjencë në spital, ku ndërroi jetë. Por përveç të shoqes ai qëlloi me breshëri, një kalimtar, Adriatik Kola dhe avokatin e bashkëshortes së tij, Gëzim Toçila. Autori është një ish-efektiv policie, i cili ishte në proces divorci me të shoqen. Burrë e grua sapo kishin dalë nga ambientet e gjykatës së Elbasanit ku ndodheshin për një seancë gjyqësore ku Koço Buzo akuzohej për dhunë në familje. Mësohet se ngjarja ka ndodhur për shkak të xhelozisë që ish-burri kishte për të shoqen. Një grua e cila ka qenë dëshmitare e ngjarjes së rënë në Elbasan ku burri vrau me armë bashkëshorten e tij për motive xhelozie, ka rrëfyer se gruaja ishte e shtrirë në tokë pasi ishte vrarë. Gjithcka ka nisur mesa duket pas vendimmarrjes së gjykatës. Në debat e sipër, jashtë godinës, Koço Buzo është larguar para të gjithëve, duke u futur në banesën e tij, e cila ndodhej pranë Gjykatës. Atje ka marrë një armë zjarri tip kallashnikov dhe ka nisur që të qëllojë. Policia ka mbërritur me urgjencë në vendin e ngjarjes, duke arrestuar në flagrancë Koço Buzon, edhe pse ky i fundit tentoi që të largohej.