Gjykata e Durrësit ka lënë në burg 76-vjeçarin Muhamet Rreshka, i dyshuar për vrasjen e vëllait të tij 74-vjeçar, Eqerem Rreshka, ngjarje e ndodhur javën e kaluar në fshatin Agonas të Kavajës. Sipas hetimeve, krimi ndodhi pas një konflikti mes dy vëllezërve, teksa viktima kaloi me zetor në një rrugë mes tokave bujqësore, e cila përdorej nga autori. Në seancë, i moshuari u braktis nga familjarët, të cilët nuk u shfaqën në gjykatë. 76-vjeçari është shfaqur tejet i penduar, teksa kur u pyet nga gjykata se çfarë kërkonte, ai u përgjigj: “Tani s’më ka ngelur asgjë. Vetëm më pushkatoni.” Sipas avokates së tij, ai ka deklaruar se, nëse do të mund ta kthente kohën pas, do t’ia jepte të vëllait gjithçka, tokën dhe shtëpinë, pasi nuk kishte dashur që konflikti të përfundonte në këtë mënyrë.